Kraw hkrap hkrang pan madun poi hpawng galaw
Hpunlum Yang (IDPs) lapran tsang jawng a kraw hkrap nampan hkrangpan madun poi hpawng lamang hpe December shata 22 ya shani kaw nna, 27 ya shani du hkra Hpunlum Yang lawk- (3) komiti rung kaw galaw nga ai re.
Ndai madun poi hpe Art Project ni kaw nna woi awn galaw nhtawm, 2014 ning kawn dai ni du hkra soi wa ai jawngma ni a hkamsha, hkrum sha lai wa ai hkrang pan sumla ni hpe madun ai re lam, lit nga ai Saranum ni tsun ai.
Tsang 8 kaw laika hpaji sharin hkamla nga ai Shayi. Maru Kai Dim shi soi da ai hkrangpan a lachyum hpe shi nan tsun dan ai hta “Ndai sumla gaw majan byin nga ai ten pa naw, majan nbyin ai ten hta shata jan mai yang grai pyaw ai raitim, majan byin taw ai ten gaw nhtoi htoi na pi hkrit ai ngu lachym re. Ndai langai mi gaw ya na zawn hpyen yen yen jam jau nga ai ten, anhte hpe garum la na masha kadai nga ai kun ngu yaw shada let soi da ai re” nga tsun ai.
Hkrangpan soi ai hta sara/num ni kaw nna, jaw da ai ga baw ni rai nga ai, Wunpawng mungdan, pala hkang, mat mat ai sim sa lam, ngai nang hpe marit nga ai, Uru hka, hten taw ai gaduk, matut nmai mat ai sumri, Covid-19 ana kanu hte anhte a shawng lam ngu ai ga baw ni kata kaw, jawngma ni tinang myit ra ai hkamsha lam hku soi ai hkrangpan sumla ni re.
Matut nna mung madun poi galaw ai a yaw shada lam hpe Hpunlum Yang lapran tsang jawng, jawng up Saranum Kaba Hpakawn Seng Brim tsun ai hta “Hkrangpan soi ai atsam grau na rawt jat wa na matu, madun gawk galaw ai a marang e ma ni grau na tinang a sumla ni hpe madun da lu ai shaloi grau hkrak hkra lu soi sa wa na re, hkrangpan soi ai jawngma ni tinang hkum myit makam lu la na matu, jawngma ni a ta maka hpe e kanu kawa ni mu chye ya lu na matu, jawngma ni a myit kraw kata hkamsha ai lam hpe mu chye hkamsha chye ya lu na matu hte hkrangpan soi ai hta kanu kawa ni grau na madi shadaw shang lawm wa na matu yaw shada ai lam re” nga nna tsun ai.
Ya na zawn Art Project ni kaw nna, hkrangpan soi ai hpaji hpe 2014 ning kawn woi awn galaw sa wa ai hta Laiza TOT area jawng 14, Sha-it Yang TOT area jawng 8 hte Mai Ja Yang TOT area jawng 7, ni hta bungli garan galaw nga ai re, bai nna ndai zawn hkrangpan madun ai lamang ni hpe matut nna mung, jawng shagu galaw sa wa mat na re, lai wa sai shaning ni hta Yangon, Myitkyina hkan, ma ni a hkrangpan madun poi ni hpe galaw la lu sai lam Art Project Saranum Kaba Hpauwung Seng Bu tsun ai.
