Rev. Dr. Hkalam Samson hpe dat ya ai lam nnga shi
Jinghpaw Wunpawng Hkalup Hpung Ginjaw, KBC a hpaji jaw Sara Kaba rai nga ai, Rev. Dr. Hkalam Samson hpe gumshem Myen hpyen dap ni December shata praw 5 ya shani hta n tara ai hku rim woi mat wa ai hta dai ni du hkra dat ya ai lam nnga shi ai hpe chye lu ai.
Ya aten hta Sara Kaba hpe gumshem Myen hpyen dap ni tara kanu 17/1 hte tara je wat da ai lam nga ai rai nna, December shata 28 ya shani Myitkyina htawng kaba de sa da sai re lam chye lu ai.
Ndai zawn Sara Kaba hpe Myitkyina htawng kaba de sa tawn da ai lam hpe gumshem Myen hpyen dap ni kaw nna, nta masha ni hte KBC de mung tsun shana wa ai lam nnga ai hpe chye lu ai.
Matut nna Sara Kaba a ningrum ningtau jan, Saranum Zung Myaw kawn, December shata 29 ya shani Myitkyina htawng kaba de sa nna Sara Kaba hte hkrum lu na matu shakut wa sai raitim, hkrum lu ai lam nnga ai rai nna, arai ni hpe sha hkap la ya ai lam chye lu ai.
Sara Kaba hpe rim woi da ai nhtoi 25 ya na sai raitim, ya aten du hkra kadai hte mung jahkrum shangun ai lam nnga ai rai nhtawm, Sara Kaba hpe je wat da ai ai tara kanu 17/1 gaw tara n shang ai wuhpung wuhpawng ni hte matut mahkai ai, magam bungli jawm galaw ai mara rai nna, htawng dam laning mi kaw nna 3 ning du hkra jahkrat mai ai hte gumhpraw dam mung jahkrat mai ai re hpe mung chye lu ai.
