KIA Masat (5) Dap Ba ginra hta gasat gala majan byin
KIA Masat (5) Dap Ba, Masat (3) Dap Dung ginra hta January shata praw 5 ya jahpawt hkying 8:30am aten hta gumshem Myen hpyen dap, P.T.Ts pawng hpawm hpyen hpung ni hte KIA ni gasat gala majan byin ai lam chye lu ai.
Dai gumshem Myen hpyen hpung ni gaw Hk.M.Y (385), Hk.L.Y (58) dap na hpyen hpung ni hte P.T.Ts hpyen hpung yawng pawng hpyen n-gun (60) daram rai nna, Num Maw Yang maga yu wa ai kaw KIA ni hkap gap ai kawn, gasat gala majan byin wa ai re lam lit nga ai salang ni kaw na chye lu ai.
Gumshem Myen hpyen dap pawm hpawm hpyen hpung ni gaw Ding Kum Yang kaw hpyen shamu shamawt du nga ai ni rai nna, Num Maw Yang maga nhtang yu wa ai shaloi gasat gala byin ai re lam chye lu ai.
Dai gumshem Myen hpyen pawng hpawm hpung ni gaw gasat gala majan byin ngut ai hpang hkying 10:30am aten laman, bai nhtang mat wa nhtawm, Man Win maga de matut lung wa nga ai re lam chye lu ai.
Gasat gala majan byin ai hta KIA maga na asak si sum hkala ai lam nnga ai raitim, gumshem Myen hpyen maga gaw asak si sum hkala ai lam nga nnga matut sagawn nga ai hpe chye lu ai.
