Gumshem Myen hpyen dap ni sinat kaba majoi gap shadam bun
KIA Masat (3) Dap Ba, Masat (15) Dap Dung ginra hta January shata praw 7 ya jahpawt hkying 9:45am aten lapran, gumshem Myen hpyen dap ni sinat kaba majoi hkrum mara gap shadam bun ai lam chye lu ai.
KIA ni shara jahkrat nga ai Lung Ja Bum de gap bun ai rai nna, dai gap bun ai hpyen dap ni gaw Nmawk hpyen dap, Deng 4 htaw wa htaw sa dap hte nbung li sinat kaba dap ni kawn 10 lang jan gap shadam bun ai re lam shawng lam shi sawk ni kaw na chye lu ai.
Matut nna mung ya aten hta Mungmyit Sinli Ga ginra rai nga ai Lashio maga na rawt lung wa ai gumshem Myen hpyen dap ni hpyenla hpring hpring htaw tawn nhtawm, lagaw lam hkawm ai ni mung lawm rai modo 30 jan rawt lung wa sai lam ginra masha ni kaw na chye lu ai.
Dai hpyen hpung ni gaw dapnu 88 hte 99 ni rai nhtawm, gara maga de rawt lung wa nga ai lam matut sagawn nga ai rai nna, Masat (6) Dap Ba, Masat (38) Dap Dung ginra Man Pying mare kaw mung, gumshem Myen hpyen dap ni lagaw lam hte hpyen hpung hku hkawm lung wa sai lam chye lu ai.
Ya aten hta gumshem Myen hpyen dap ni KIA ni dap jung shara jahkrat nga ai shara ni hta hpyen shamu shamawt lung wa nga ai rai nna, gasat gala majan mung byin nga ai re.
