U Yan Sinwa Nhpan Ja Ra Madu Yesu hta yup pyaw mat
Wunpawng amyu sha ni yawng a shingni hpushawng hpuba yu ngwi ninghkring kaba rai nga ai, Saranum Kaba U Yan Sinwa Nhpan Ja Ra gaw, January shata praw 9 ya jahpawt hkying 9:45am aten, madu yesu hta yup pyaw mat wa sai lam chye lu ai.
Saranum kaba gaw asak 91 ning rai sai rai nhtawm, mungkan a machyi makaw ana zinli a majaw, January shata praw 6 ya shani kaw nna tsi rung hta tsi tsi hkam la nga ai kaw madu yesu hta yup pyaw mat wa sai re lam chye lu ai.
Matut nna Saranum kaba a hkum tsawp moi mang hpe Myo Tit lawk, shi nga ai dum nta hta tawn da ai rai nhtawm, January shata 11 ya shani hkristan lup ding lup ra rai nga ai Jaw Bum kaw makoi mayang sa wa na re lam chye lu ai.
Saranum kaba gaw shi a asak si mat wa ai kaw du hkra, Wunpawng myu sha ni a, yu ngwi shingni ning hkring kaba rai ai sha n-ga, amyu sha lam yan hta atsam htum hkra shakut shaja ap nawng lai wa sai hte yu ngwi shingni lam magup hta mung, lam madun shadum sharin pawnba ap nawng shakut shaja lai wa sai re.
