Gumshem Myen hpyen dap kawn KIA ni nga ai shara de laknak kaba 30 jan lang gap sharu bun
KIA Masat (3) Dap Ba, Masat (15) Dap Dung ginra, Lung Ja Bum mayan de, January shata praw 10 ya jahpawt hkying 10:00am aten daram kaw nna, Manmaw hte Nmawk gumshem Myen hpyen dap ni laknak kaba hte (30) jan lang gap sharu bun nga ai lam, ginra masha ni tsun ai.
“Manmaw deng (4) htaw wa htaw sa dap hte Nmawk gumshem Myen dap kaw nna, Lung Ja Bum mayan de laknak kaba gap shalun bun nga ma ai. Kalang lang gaw grai ngoi ai, kalang lang gaw wa hkrat kapaw ngoi ai pi nna ai, 30 jan lang rai sai” nga nna ginra masha langai tsun ai.
January shata praw 7 ya shani hta mung, KIA ni shara la nga ai Lung Ja Bum mayan de, ndai gumshem Myen hpyen dap ni sha, laknak kaba (10) jan lang gap bun ai re.
KIA Masat (2) Dap Ba Daju, Masat (14) Dap Dung hpyen dap, Masat (9) Dap Ba, Masat (26) Dap Dung ginra Bum Run Psot hte Masat (31) Dap Nawng Dap Dung Mile (10) Kawng Post shara ni hta January shata praw 9 ya shana maga hkying 4:00pm aten hte hkying 8:15pm aten ni hta gumshem Myen hpyen dap ni Jet Fighter nbungli bawm wa jahkrat bun ai lam na chye lu ai.
Gumshem Myen hpyen dap, Hk.L.Y (86), Hk.L.Y (238) hte Hk.M.Y (318) dap, Danai D.K.Ts kata na pawng hpawm hpyen n gun (100) daram mung, KIA Masat (2) Dap Ba ginra de lagaw lam shamu shamawt htu lung wa hkyen nga ai lam, ginra masha ni tsun ai kaw na chye lu ai.
