Hpyen yen camp dawm kau na matu, gumshem Myen hpyen ni galaw nga

Myitkyina Muklum kata nga ai hpyen yen camp ni yawng hpe dawm kau na matu, gumshem Myen hpyen ni galaw nga ai rai nna, hpyen yen camp shagu a mying jahpan hpe hta ngut sai lam chye lu ai.

Bai du wa na March shata hta hpyen yen camp ni yawng hpe dawm kau lu hkra galaw nga ai sha n-ga, hpyen yen mung shawa ni yawng madu myit da ai shara de nwa nmai wa ra na lam, gumshem Myen hpyen ni galaw nga ai hpe chye lu ai.

Hpyen yen mung shawa ni hpe tinang a masing hte tinang wa na ni, mare buga de wa na ni hte gumshem Myen hpyen ni a masing kata kaw nga na ni nga nna, ga baw amyu myu shaw let mying jahpan hta ngut  sai re lam chye lu ai.

Ndai masing hpe lai wa sai 2022 ning kawn, gumshem Myen hpyen ni galaw wa sai raitim, dawm kau lu ai lam nnga ai sha n-ga, hpyen yan shagu de laika sa ai lam ni galaw lai wa sai rai nhtawm, seng ang ai gumshem Myen hpyen hkring mang ni kaw nna mung, hpyen yen camp de sa nna lawan htawt sit na matu sa tsun ai lam ni nga lai wa sai lam chye lu ai.

Gumshem Myen hpyen ni kaw nna, hpyen yen camp dawm kau na matu nbyin nmai galaw sa wa nga ai rai nna, 2023 ning hta gaw yawng dawm kau lu hkra galaw sa wa nga ai re hte Myitkyina Muklum kata hta hpyen yen camp yawng 20 jan nga ai lam chye lu ai.