Gumshem Myen hpyen n gun 100 jan hte KIA ni gasat gala majan byin
KIA Masat (3) Dap Ba, Masat (12) Dap Dung ginra, Maungthar mare makau kaw, January shata 14 ya shani hkying 11:00am aten daram hta gumshem Myen hpyen n gun 100 jan daram hte KIA ni gasat gala majan byin ai lam, shawng lam na lit nga ai salang ni kaw na chye lu ai.
“Gumshem Myen hpyen dap ni gaw, Hk.L.Y (223, 237), Hk.M.Y (319) dap na pawng hpawm hpyen n gun 100 jan daram re. Modo 2 hte ga ganaw jak louder 1 mung lawm ma ai” nga nna lit nga ai salang wa tsun dan ai.
Gasat poi byin ai gaw minute 10 daram dang sha re. Ndai gumshem Myen dap ni gaw, Namlim Pa de n gun jat sa wa ai hte hpawn lam galaw nhtawm, sinat machyu pala malu masha bai htaw bang hkyen ai masa pru ai, nga nna salang wa matut tsun ai.
Namlim Pa kaw dap jung shara la nga ai Hk.L.Y (247) gumshem Myen hpyen dap ni mung, Namlim Pa mare masha ni a, u wa yam nga ni hpe mung kam mara gap sat sha kau ya ai sha n ga, dum nta kaja ni hpe run la kau ya ai, manu dan ai arung arai ni hpe la kau ya ai lam ni mung nga ai hpe chye lu ai.
Mare masha ni kaw nna, dum nta wa yu gawan na matu, Myen hpyen dap ni hpe tsun ai raitim, ahkyang jaw ai lam n nga ai, nga nna ginra masha ni tsun ai kaw na chye lu ai.
