Rev. Dr. Saga Hkyen Naw a hkum tsawp moimang hpe makoi mayang akyu hpyi hpawng galaw
Rev. Dr. Saga Hkyen Naw (KTCS Jawng Up Usa) asak (78) ning gaw, 2023 ning, January shata 17 ya shana hkying 9:30pm aten hta Myitkyina mungshawa tsi rung kaba hta Madu Yesu hta yup pyaw wundoi mat wa sai re.
Sara Kaba a hkum tsawp hpe, January shata 21 ya shani ka-ang hkying 12:00 Noon aten hta Myikyina Muklum Yangyi Aung nta nambat (No.68) dum nta kaw akyu hpyi la nhtawm, AD 2000 Gawknu de htawt sit da ai hpe chye lu ai.
Makoi mayang akyu hpyi hpawng lamang hpe, January shata 22 ya shana hkying 1:00pm aten hta Jinghpaw Wunpawng Chyum Dakkasu Nawng Nang, AD 2000 Gawknu hta galaw na rai nga ai. Hkum tsawp moimang hpe Wunpawng Hkristan lupding lup-ra Nawng Nang de shalim shatsim makoi mayang na re lam chye lu ai.
Sara Kaba gaw, KTC magam bungli hpe lai wa sai 1990 ning kaw nna, 2015 ning, shaning 25 ning tup apnawng gunhpai shakut shaja lai wa sai hpe mung chye lu ai.
Rev. Dr. Saga Hkyen Naw gaw, KBC htamshi masing hpe shing-ran woi mu ai. KTC Chyum Dakkasu masing hpe tatut hkrang shapraw woi awn shakut shaja sai hte KTCS Jawng Up magam bungli hpe kangka sadi dung let gunhpai apnawng lai wa sai sha n-ga, amyusha ni hte seng ai magam bungli ni hta mung shanglawm lai wa sai hpe chye lu ai.
