KIA Masat (6) Dap Dung ginra hta gasat gala majan byin
KIA Masat (9) Dap Ba, Masat (6) Dap Dung ginra, Hpakant Yuma mare Ever lung seng company wang kaw shara jahkrat nga ai, gumshem Myen hpyen ni hpe January shata 23 ya jahpawt hkying 5:15am aten hta KIA, PDF pawng hpawm hpyen hpung ni sa htim gap ai kawn gasat poi byin ai lam chye lu ai.
Gasat poi hta gumshem Myen hpyen maga si hkala lam nga ai hte Myen hpyen ni laknak kaba gap shadam ai hta mare kata de wa hkrat kapaw ai lam nga ai raitim, mare masha ni hta hkra hkala ai lam nnga ai hpe ginra masha ni kaw na chye lu ai.
Gasat poi zim ai hpang Hpakant Beli mahkrai kaw gumshem Myen hpyen ni laiwa laisa mungshawa ni a cycle, modo ni hpe sawk jep ai lam galaw nga ai hpe mung chye lu ai.
January shata 22 ya shana maga hkying 4:30pm aten hta mung, Hpakant Tatma Kawng kaw nga ai, Hk.L.Y (76) dap ni kaw nna, Maw Wan, Seng Wan Lawk maga laknak kaba 82mm (2) lang gap shadam bun ai lam nga ai, Hk.M.Y (120) dap ni mung, Taw Maw maga de laknak kaba 120mm (1) lang gap bun ai lam chye lu ai.
January shata 22 ya shana hta sha, gumshem Myen hpyen dap ni kawn mying n chye ai mungshawa La marai lahkawng hpe, Lawnghkang Paw Oo lusha seng shawng kaw gap sat da ai lam, buga masha ni kaw na chye lu ai.
