(2) lang na tsang (12) jawng yu poi shagrau sha-a hpawng galaw

2021-2022 hpaji ladaw Sama Ginwang Sasana Jawng a (2) lang na tsang (12) jawng yu poi shagrau sha-a hpawng hpe, January shata 27 ya jahpawt hkying 8:00am aten hta Laiza Muklum lawk (1) Nawng E Hku Sama Ginwang Sasana lahta tsang jawng wang kaw galaw la lu sai re.

Hpawng hta nawku hpung woi sara kaba ni kaw nna, akyu hpyi ya nhtawm, jawng a lam hpe shachyen ya ai hpang, jawng yu sai jawngma ni hpe jawng yu lekmat shagrau ai lam galaw ai.

Dai ni yu ai jawngma yawng marai (11) hta marai (6) sha wa du shang lawm lu ai rai nna, ngam ai marai (5) gaw hkrum lam yak hkak ai majaw nlu wa shang lawm ai hpe chye lu ai.

Du Kaba Wana Yaw Htung (Wunpawng Mungdan Shanglawt Asuya, Ginjaw Hpaji Dap Lit Hkam) kaw nna, n gun jaw shatsam mungga hpe ndai zawn tsun ai.

“Dai ni gaw anhte gat hkai ai hte maren dan la lu ai lam rai sai. Jawng a labau lami laman hpe yu ai shaloi, lawu tsang lapran tsang lahta tsang (12) du sai, rawt jat wa ai lam rai nga ai. Ndai zawn rawt jat wa na lam hta anhte kanu kawa ni, ayak ahkak jamjau jamhkau hkrum let, anhte jawm shakut ai majaw, Karai Kasang a chyeju hte ndai zawn byin wa ai lam rai sai.

KIO kaw nna hpaji lam hte seng nna masing jahkrat nhtawm galaw sa wa ai mung nga mali ai, dai kaw yaw shada lam (5) rai nga ai. (1) Wunpawng Amyu hte mungdan sha ni yawng laika hpaji chyechyang kunghpan rawt galu kaba wa hkra woi awn sa wa na. (2) Ningpawt ninghpang lawu tsang jawng madang kaw nna, lahta tsang college dakkasu jawng madang du hkra hpaw maden sharin achyin sa wa na. (3) Sara hpaji jawng ni hte machyoi hpaji sharin jawng ni hpaw sharin nhtawm, kungkyang ai sharin sara ni hte atsam ningja rawng ai magam gun masha ni shalat sa wa na. (4)  Amyusha hpaji masa lam yan hta tatut woi awn hkrang shapraw sa wa na hpaji dap, hpaji rung, tsang hte tsang hpaw sa wa na. (5) Tinang amyusha hpaji masa lam yan hte bung pre nna, prat madang dep ai sharin ginhpan sharin ladat, sharin lai masa ni hpe myit mang jasat, sawk gyin shalat nna sharin sa wa na” ngu ai re nga nna jawng yu sai jawngma ni hte du sa ai kanu kawa shawa masha jinban yawng hpe ra mara numhte numra shatsam mungga tsun ya sai re.

Sara Kaba Maji Naw Hkawng (Sasana Jawng Up) kaw nna mung, sasana jawng a yaw shada lam hpe ndai zawn tsun ai.

“Karai Kasang hpe hkrit hkungga ai Ma ni hpe shalat ai, mungkan madang dep ai hpaji hpe anhte a ginra kaw nan sharin ya nna, tinang a amyusha lam  hpe mung chye, mungkan madang mung dep, du wa na ten a ningbaw ningla ni hpe shalat na matu yaw shada ai lam rai sai” nga nna tsun ai.

Ndai jawng gaw Sama Ginwang ni a jawng sha nre ai, anhte amyusha ni yawng a matu mungkan madang dep ai, myutsaw mungtsaw Karai Kasang hpe hkrit hkungga ai ningbaw ningla ni hpe shalat na matu hkyen shajin nga ai jawng re majaw, jawng hte seng ai lam jahkum shatsup hpaji jaw nna lai wa lai sa ni wa du shang nhtawm ndai jawng hpe anhte a ginra hta kaba wa hkra, mungkan chya wa lu hkra, jawm shakut ai jawng rai hkra yawng naw jawm jahkum shatsup ga, nga nna matut tsun ai.

Ndai Nawng E Hku Sasana jawng hta madung subject gaw, English rai nna Miwa programe mung lawm ai. (1) lang na tsang (12) hta jawng yu sai jawngma yawng marai (16) rai nna, 2022-2023 hpaji ladaw hta Sasana Jawng hta sharin hkamla nga ai jawngma yawng marai (500) jan, sharin sara/num ni yawng marai (40) re lam chye lu ai.

Sama Ginwang Nawng E Hku Sasana jawng hpe lai wa sai 1992 ning kaw nna lawu tsang madang hku hpaw hpang sai. 2011 ning hta tsang (5) bai hpaw jat let, English hpe madung tawn nhtawm, hpaw sharin sa wa ai gaw, 2021-2022 hpaji ladaw kaw nna tsang (12) madang du hkra hpaw sharin ya nga lu sai hpe mung chye lu ai.