KIA Masat (26) Dap Dung ginra hta gumshem Myen hpyen dap hte KIA gasat gala majan byin
KIA Masat (9) Dap Ba, Masat (26) Dap Dung ginra, Sezin mare mayan hta nga ai, gumshem Myen hpyen dap hte KIA ni, January shata 27 ya shana hkying 6:00pm aten hta gasat gala majan byin ai lam chye lu ai.
Sezin mare makau hta sha, January shata 26 ya shani hta mung, gumshem Myen hpyen dap hte Pyi Tu Tsit ni a hpyen dap hpe KIA ni sa htim gap gasat zing kau nhtawm, hpyen dap ginsum ni hpe wan nat jahten kau ya ai lam nga sai re.
KIA Masat (44) Dap Dung ginra, Nam Sheng Bum kaw nga ai gumshem Myen hpyen dap, Hk.M.Y (12) dap ni mung, January shata 27 ya jahpawt 3:43am aten hta Nam Sheng mare a sinna, dingdung maga de, sinat kaba hkrup mara gap bun ai lam mung nga ai.
Kamaing Byuha Kawng kaw dung ai gumshem Myen hpyen dap ni mung, January shata 27 ya shana hkying 9:50pm aten hta Man Den Mare maga de, sinat kaba (2) lang gap bun ai lam, ginra masha ni kaw na chye lu ai.
