Gumshem Myen hpyen dap ni hpe KIA ni bawm hte hkap shingla gasat
KIA Masat (3) Dap Ba, Masat (15) Dap Dung ginra, Manmaw Nmawk maga de na shamu shamawt htu lung wa ai, gumshem Myen hpyen dap hpe, January shata 31 ya jahpawt hkying 8:00am aten hta Law Dan kadawng kaw KIA ni bawm hte hkap shingla gasat ai lam chye lu ai.
Bawm hte hkap gap gasat ai hta gumshem Myen hpyen maga si hkala nga ai raitim, mare kade re hpe tuk hkrak n chye lu shi ai lam, shawng lam shisawk ni kaw na chye lu ai.
Ndai zawn gumshem Myen hpyen dap ni machyi hkrum ai majaw, sinat kaji kaba makau grup yin shara de, majoi gap sharu bun ai sha n-ga, Zin Lum kaw nga ai, gumshem Myen hpyen ni mung, sinat kaba hte (3) lang gap shadam dat ai lam chye lu ai.
January shata 29 ya shani hta mung, KIA Masat (3) Dap Ba, Masat (27) Dap Dung ginra, Loi Hkam Bang Htan maga na shamu shamawt chyinglau shang wa ai, gumshem Myen hpyen dap, Hk.L.Y (47) hte Hk.M.Y (348) pawng hpawm dap ngu maram ai hpyen n gun (100) daram hpung ni hte KIA ni, Dung Hkung Bum makau kaw gasat poi byin ai lam matut chye lu ai.
