Ja htu sha ai lauban lahkawng a, ginsum hpe Pyi Tu Tsit ni drone bawm lahkawng sa jahkrat bun
KIA Masat (2) Dap Ba ginra, Nam Hpyek Ja Maw kaw Ja htu sha nga ai, lauban marai lahkawng a, ginsum hpe February shata praw 1 ya shana maga hkying 5:00pm aten hta Min Zin Tan, Pyi Tu Tsit hpyen hpung ni drone bawm (2) lang sa jahkrat bun ai majaw, backhoe pat hkra ga mat ai lam chye lu ai.
Lai wa sai January shata hta mung, gumshem Myen hpyen dap ni kaw nna, Woi Law Ja Maw kaw nga ai gat seng (10) hte Lapu Hka Ja Maw na gat seng (5) hpe wan nat jahten kau ya ai sha n-ga, jak li (14) hpe mung rim zing kau ya ai lam ni byin lai sai re.
KIA Masat (3) Dap Ba, Masat (15) Dap Dung ginra hta January shata 31 ya shani KIA ni nga ai shara de, gumshem Myen hpyen dap ni htu shadut lung wa ai majaw, Law Dan kadawng kaw KIA ni bawm hte hkap shingla gasat dat ai re.
Gumshem Myen hpyen maga, si hkala nga ai majaw makau grup yin shara ni de, sinat kaji kaba hte gap dumbre bun ai sha n-ga, Law Dan mare na salang Lasang Ahpu a, hpun pyen nta hpe mung wan nat jahten kau ya ai lam chye lu ai.
