KIA Dap Dung (9) ginra hta gasat gala majan matut byin
Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra de, shamu shamawt htu lung wa ai gumshem Myen hpyen hte KIA ni, February shata 14 ya jahpawt hkying 7:48am aten kaw nna gasat gala majan matut byin nga ai hte Jet nbungli ni hte mung bawm wa jahkrat bun ai lam chye lu ai.
“Gasat poi gaw, Bum Sen kaw byin ai, hkying 11:41am aten hta Kayun Kawng kaw Jet Fighter Yak-130 (2) hte bawm wa jahkrat bun ai, hkying 12:16pm aten hta numdaw (2) lang, hkying 2:16pm aten hta numdaw (3) lang wa htim gap kau da nna, nhtang mat wa sai” nga nna shawng lam na lit nga ai salang langai tsun dan ai.
Karai Kasang a chyeju hte masha gaw hpa nra ai, nta ginsum nkau gaw wan hkru mat ai lam gaw nga ai, Jet nbungli gaw, Tada U maga na lung wa ai re nga tsun ma ai, nga nna salang wa matut tsun ai.
Gasat poi byin ai shara de, Namhpaka kaw dap jung ai gumshem Myen hpyen Hk.L.Y (123) dap ni kawn gauhkau kaw kapaw ai baw laknak kaba hte gap bun nga ai lam chye lu ai.
Dapnu (99) na gumshem Myen hpyen dap ni gaw, February shata 10 ya shani kaw nna, hpyen modo (21) hta hpyen n gun, laknak machyu pala ni, ginra Pyi Tu Tsit ni hte pawng hpawm nhtawm, hpyen n gun 300 daram hte KIA Masat (9) Dap Dung ginra de htu shadut htim gasat lung wa ai re hpe mung chye lu ai.
