Masat Yan 8 Media Training yu hpawng galaw
Masat Yan 8 Media Training yu hpawng hpe February shata 16 ya shani hkying 10:00am aten, Shiga Magam Dap kaw galaw la lu sai re.
Media Training hpe Shiga Magam Dap kaw nna, woi awn galaw ai rai nhtawm, 2022 ning June shata kawn hpaw hpang sharin wa ai re lam chye lu ai.
Hpawng hta Media Training yu sai jawngma ni hpe Shiga Magam Dap Lit Hkam, Du Kaba Nhpang Naw Bu kaw nna, shatsam mungga tsun ai hta “Hpaji ngu ai gaw kade ram du hkra sharin da ai raitim mung, ta tut njai lang yang malap wa, dingsa mat wa ai, kade manu dan ai arung arai hpe mi lu madu da ai raitim, dai arung arai hpe nang akyu n jashawn jang gaw, manu ndan ai arung arai tai wa ai, anhte sharin da ai hpaji ni mung nshaw jai lang wa yang manu ndan ai hpaji ni tai wa ai hku re, dai majaw akyu rawng ai manu dan ai magam bungli hpaji byin tai wa hkra, anhte amyu hte mungdan a matu ap nawng daw jau mu ngu na ahkaw ahkang jaw dat ai lam rai sai” nga nna tsun ai.
Dai ning na masat yan 8 Media Training jawngma ni hpe gaw, shawng de sharin ai training ni hta grau nna aten la, grau na jahkum shazup ai lam ni hpe galaw ai, lai wa sai ten hta bat mi, shi ya, shata mi sharin ai raitim ya gaw, nhtoi 180 ya sharin ai lam re nga nna Lit Hkam matut tsun ai.
Media Training hta sharin hkamla sai ramma ni yawng marai 13 rai nna, Shiga Magam Dap hpe gaw lai wa sai 2012 ning kawn hpaw hpang wa ai re lam chye lu ai.
