Mungkan ka-ni nanghpam ninghkap masat ninghtoi hpawng galaw
June 26 ya shani gaw mungkan ka-ni nanghpam ninghkap masat ninghtoi rai nga ai hte maren, daihpawt hkying 8:00am aten hta mung, Laiza Muklum, Manau wang Sinpraw Majoi Gawknu kaw magam dap, makan dap, ginjaw amyu shayi hte mungshawa ni yawng marai ( 800 ) jan shanglawm ai hte hpawng lamang galaw ai lam chye lu ai.
Hpawng hpe sara ni akyu hpyi ap nawng nna, shawa nsen hte “Amyu sha ni a hpyen madung ka-ni nanghpam hpe Karai Kasang a chyalai n-gun hte gasat kau ga. Ka-ni nanghpam hpyen hpe mungshawa ninggun hpungtun kaba hte gasat kau ga. Ka-ni nanghpam tsin yam hpe yengseng kau lu ai shani du hkra gasat sa wa na” nga ai shawa nsen marawn ai lam galaw ai.
Ginjaw Hkamja Dap lit hkam Du kaba Lahpai Hing Wawm kaw nna mung, shatsam mungga hte ra mara hpe tsun ai hta “Mungkan ka-ni nanghpam ninghkap masat ninghtoi hta ya na zawn anhte ding yang galoi mung, madi shadaw ai lachyum hku nna, anhte KIO hku nna mung galaw taw nga ai hpe mungkan de shadan shadawng ai lam re. Dai majaw anhte ni laiwa sai ten hpe myit dum nna, dai ni anhte kaw byin taw nga ai lam ni hpe myit dum let, matut nna mung grau grau na, ndai hpe ginjaw a woi awn ai kata kaw mungshawa yawng gaw, lahkrip ra ra ninghkap sa wa na re” nga nna tsun n-gun jaw ai.
Mungkan ka-ni nanghpam ninghkap masat ninghtoi byin wa ai lam gaw, lai wa sai 1839 ning hta Miwa mung Kawng Dung kaw British hte Miwa ni ( 1 ) lang na ka-ni majan hta magrau grang grang hte woi awn gasat nna mying gum hkawng ai mungmasa Slg. Ring Ze Shi hpe masat shagrau ai hku na mung, 1987 ning June shata 12 hte 26 ya laman Austria Mungdan Vietnam mare daju kaw galaw ai Mungkan Wunpawng Hpung Zuphpawng kaba hta mungdan ( 138 ) kaw na Dat kasa salang ni marai ( 3000 ) jan shang lawm ai zuphpawng kaba kaw dai ni na nhtoi hpe, mungkan ka-ni nanghpam ninghkap masat ninghtoi ngu daw dan masat dat ai re lam hte, dai ni du hkra rai yang masat ninghtoi gaw ( 29 ) lang rai sai lam chye lu ai.
