KIA Masat (9) Dap Dung hte Masat (27) Dap Dung ginra hta gasat gala majan byin
Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra hta February shata 17 ya jahpawt hkying 9:00am aten daram kaw nna, gumshem Myen hpyen dapnu (99) kata na hpyen hpung ni hte KIA ni, Nahpai ntsa Bum Chyen Bum kaw gasat poi matut byin ai lam chye lu ai.
Mani hkying 11:21am aten hta mung, Kayun Kawng kaw du nga ai, gumshem Myen hpyen ni hpe KIA ni sinat kaba sa gap bun ai hpang ndai hpung ni gaw htingnut mat wa sai raitim, hpung lahkawng naw rawng nga ai, hkying 4:47pm aten hta Na Samu mare dingsa kaw hpung langai hte jahkring mi gasat poi byin ai lam, shawng lam shisawk ni kaw na chye lu ai.
Ndai gasat poi hta gumshem Myen hpyen maga si hkala ram ram law mat ai majaw, lahkawng ya tup Jet Fighter nbungli hte bawm wa jahkrat bun ai sha n-ga, ganghkau kaw kapaw ai baw laknak kaba ni hte gap bun ai hta KIA maga marai lahkawng asak apnawng mat ai lam, lit nga ai salang ni kaw na chye lu ai.
February shata 10 ya shani kawn, gumshem Myen hpyen ni modo 21 hte lung wa nna, ginra Pyi Tu Tsit hte pawng hpawm nhtawm, KIA Masat (9) Dap Dung, hpyen dap hpe wa htim gasat nga ai re hpe mung chye lu ai.
KIA Masat (3) Dap Ba, Masat (27) Dap Dung ginra hta mung, gumshem Myen hpyen hpung ni hte KIA ni February shata 17 ya shani hta shara lahkawng kaw gasat poi byin ai lam nga ai.
Dai hpawt hkying 8:00am aten daram hta Banggaw lawu Nammak Zup hte Hkrai Dun lapran kaw shara mi, hkying 10:25am aten kaw na hkying 10:45am aten du hkra, Pangsak mare makau Nat Gyi Tsin kaw gaw, bawm hte hkap shingla gasat dat ai hpang, gumshem Myen hpyen ni shanhte hkrai shanhte sinat majoi gap dumre ai rai nna, ndai gumshem Myen hpyen n gun 100 jan gaw, Munghkawng hpyen dap kaw du shang nga sai lam, ginra shisawk ni kaw na chye lu ai.
