KIA Masat (27) Dap Dung ginra hta gasat gala majan matut byin
Sinpraw Ginwang Ginjaw, KIA Masat (3) Dap Ba, Masat (27) Dap Dung ginra hta February shata 19 ya shani, shara 2 kaw gumshem Myen hpyen hte KIA ni gasat poi byin ai lam chye lu ai.
“Dai hpawt hkying 7:30am aten hta Munghkawng Mare baw Hkai Ring Pa kaw KIA ni Myen hpyen ni hpe bawm hkap dem bun ai hta gumshem Myen hpyen la marai (6) hpe garawt mat wa masai nga na lu ai. Hkying 2:15pm aten daram hta gaw, Zup Ja mare makau kaw gasat poi byin ma ai. Dai na gaw Laika Mare kaw hkring nga ma ai” nga nna ginra masha ni kaw na sagawn chye lu ai.
Ndai gumshem Myen hpyen ni gaw, Munghkawng Hpyen Dap kawn pru wa ai ni rai nna, hpyen n gun 100 jan re hte February shata 18 ya shani hpung mi pru mat wa sai lam chye lu ai.
KIA Masat (27) Dap Dung ginra de, February shata praw 5 ya shani kaw nna, gumshem Myen hpyen dap, Hk.L.Y (47, 250), Hk.M.Y (319, 424, 601) dap na pawng hpawm hpyen hpung ni shamu shamawt chyinglau hkawm ai majaw, KIA hte jahkring hkring gasat poi byin nga ai re.
Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra de, htu shadut htim gasat lung wa ai gumshem Myen hpyen dap, Dapnu (99) hte Pyi Tu Tsit pawng hpawm hpyen hpung ni mung, htingnut mat ai lam gaw nga sai raitim, Masat (36) Dap Dung ginra, Munggu maga de hpyen modo 10 jan bai lung wa sai lam, shawng lam shiga lawk kaw na chye lu ai.
