Muse Ginwang Ramma sharin bawngban hpawng galaw
Mungmyit Sinli Ramma Hpung kata na Muse Ginwang Ramma Komiti kaw nna woi awn nhtawm, ramma sharin bawngban hpawng hpe Mungbaw Wing Seng mare nawku jawng kaw galaw la lu sai lam chye lu ai.
Hpawng hpe February shata 20 ya shani manam zup, 21 hte 22 lahkawng ya sharin ninghtoi rai nna, 23 ya shani manam bra sai lam, Mungmyit Sinli Ramma Hpung ni kaw na chye lu ai.
Sharin hpawng a yaw shada lam hpe, Sara Shekoi Dau Ze (Mungmyit Sinli Ramma Hpung Ningbaw) kaw nna ndai zawn tsun ai.
“Mungmyit Sinli Ramma Hpung a bungli masing langai mung rai, Mungmyit Sinli Ramma shagu gaw, Ninggawn Mungmasa hpe chye na hkawnhkrang nga na matu madung yaw shada ai rai nga ai”
Sharin bawngban hpawng hta Ninggawn Mungmasa, Mungmyit Sinli labau chye ging chye mai ai lam, ramma ni hpe ningmu magup hpaji jaw ai lam, ramma ni myusha lam yan hta gara hku shanglawm sa wa na ngu ai ga baw ni hpe bangban ai hte ginsup lamang ni mung lawm ai lam, sara matut tsun ai.
Mungmyit Sinli Ramma Hpung Main Komiti kaw nna, ndai sharin bawngban hpawng hta Munggu Ginwang ningnan hpe bai hpaw jat la lu sai hte komiti marai (7) hpe mung lata san da ya lu sai rai nga ai.
Sharin bawngban hpawng hpe, Muse Ginwang Ramma Komiti kaw nna woi awn ai hte shawng ningnan lang galaw ai rai nna, hpawng hta du sa ai ramma yawng marai (130) re hpe mung chye lu ai.
Mungmyit Sinli Ramma Hpung kata kaw Kutkai Ginwang, Lashio Ginwang, Muse Ginwang, ya na ginwang ningnan Munggu Ginwang hte rai yang ginwang (4) du nga sai rai nna, matut nna mung, Mungmyit Ginwang hte Gangming Ginwang lahkawng hpe bai hpaw jat na re lam, Main Komiti kaw na chye lu ai.
