KIA Masat (27) Dap Dung ginra hta gumshem Myen hpyen ni hte KIA ni gasat gala majan matut byin
KIA Masat (3) Dap Ba, Masat (27) Dap Dung ginra hta shamu shamawt hkawm ai, gumshem Myen hpyen dap hte KIA ni, February shata 23 ya jahpawt hkying 8:20am aten daram kaw nna, Tin Tan kawng mayan hta gasat gala majan matut byin ai lam chye lu ai.
Gumshem Myen hpyen dap, Hk.L.Y (223, 236) dap na pawng hpawm n-gun 130 daram hpyen hpung ni gaw, Maji Gung kaba de lung wa ai ni re lam, ginra shisawk ni kaw na chye lu ai.
Ndai gumshem Myen hpyen hpung ni hte KIA hpyen hpung ni, February shata 21 ya shani kaw nna, Laika mare Zup Ja mare hte Tin Tan Kawng mayan hta masum ya tup gasat poi byin nga ai re.
KIA Masat (27) hpyen hpung ni shara la nga ai ginra de, gumshem Myen hpyen hpung ni htu shadut lung wa ai majaw, shani shagu ngu na gasat poi byin nga ai hte ya mung, lahkawng maga hpyen masa naw shaja hkat nga ding yang re lam chye lu ai.
KIA Masat (5) Dap Ba, Masat (3) Dap Dung ginra hta mung, Shangaw maga na yu wa ai, gumshem Myen hpyen Hk.M.Y (521) dap na hpyen hpung ni hte KIA ni, February shata 22 ya jahpawt hkying 9:00am aten hta Saw Law hte Sani Hku lapran kaw hkap gap ai kawn gasat poi byin ai lam chye lu ai.
