Gumshem Myen hpyen hpung ni hpe KIA ni bawm hte hkap shingla gasat
KIA Masat (3) Dap Ba, Masat (27) Dap Dung ginra hta shamu shamawt chyinglau hkawm ai, gumshem Myen hpyen hpung ni hpe February shata 26 ya shana maga hkying 2:56pm aten hta Gashawt Mare makau kaw KIA ni bawm hte hkap shingla gasat dat ai lam chye lu ai.
Gumshem Myen hpyen dap, Hk.L.Y (233, 236) na pawng hpawm n-gun (100) daram gaw, Maji Gung Kaba maga htu shadut lung wa ai majaw, hkap gasat ai re lam, lit nga ai salang ni tsun ai.
KIA ni bawm hte hkap shingla gasat ai hta gumshem Myen hpyen maga si hkala gaw nga ai raitim, marai kade re tup hkrak n chye lu shi ai re. Myen tai hpyen maga machyi hkrum ai majaw, makau grup yin shara ni de, sinat kaji kaba majoi gap dumbre bun ai lam chye lu ai.
February shata 25 ya jahpawt hkying 9:57am aten hta mung, Zau Bung Uma Bum Mare makau hkan shamu shamawt nga ai, Hk.L.Y (47, 259) dap na pawng hpawm hpyen n-gun (100) jan hte KIA ni gasat poi byin ai re lam chye lu ai.
