Shingja Miwa ga, laika sharin jawng hpaw hpawng galaw
Shingja Miwa ga,laika sharin jawng hpaw hpawng hpe February shata 28 ya jahpawt hkying 8:00am aten hta Laiza Muklum Lawk(5) kaw galaw ai lam chye lu ai.
Miwa ga, laika sharin ai a yaw shada lam hpe Shingja Miwa jawng a Founder rai nga ai Sara N-gang Zau Dan Awng kaw nna ndai zawn tsun ai.
“Anhte KIO uphkang ginra rai nga ai Laiza ginra gaw, Miwa mung hte matut mahkai ai re majaw, mungdan lahkawng gaw, ga nhkrum ai lam ni, kanawn mazum ai lam ni mungdan lahkawng na, Asuya tsang ni nnga mungshawa ni nnga shani shagu ngu na daram matut mahkai sa wa ai lam hta grau nna prinyem na matu, matut mahkai lam ni hta dut dang ai lam ni hpe lai di lu na matu gaw, mungdan lahkawng a ga hkawnhkrang ai masha ni law law ra ai re”
Ndai Shingja Miwa ga/laika jawng hta Miwa dakkasu jawng kaw maigan jawngma ni hpe sharin ya ai Developing Chinese sharin hpan kata na Comprehensive Course, Reading and writing Course, Speaking Course hte Listening Course ni hpe hkum hkum tsup tsup sharin ya na re.
Jawng hta asak pang hte aten chyarang ni hpe mung garan da ai re. Asak 8 ning kaw nna, 13 ning Ma kaji pang hpe gaw shana daw hkying 2:00pm to 4:00pm aten du hkra sharin nhtawm, 13 ning lahta na ni hpe gaw aten lahkawng garan nna sharin na re. Jahpawt hkying 7:00am to 9:00am shana daw hkying 5:00pm to 7:00pm aten du hkra sharin sa wa na re hpe chye lu ai.
Sharin ten langai hta jawngma marai 30 hkap la sharin na, nlaw htum jawngma marai 10 mahkawng la nhtawm laksan aten jahkrup la mai ai hte sharin manu gaw, ningpawt ninghpang hpe shata 4, shata 1 hta yuan 150 shata 4 na yuan 600 re hpe chye lu ai.
Miwa ga, laika hpe ningpawt ninghpang kawn hpang nna ta tut magam bungli galaw ai hta jai lang lu na mtu tang du hkra sharin hkamla mayu ai ni, Hanyu Shuiping Kaoshi (HSK) san poi htai nna, Miwa dakkasu ni de Miwa ga, laika hku hpaji matut hkaja mayu ai ni hpe hkap la sharin ya ai, Miwa Gumsan Mungdan Yuanan hte Beijing Dakkasu na B.A, M.A janmau lu da sai sara/num ni lit la sharin sa wa na re hpe chye lu ai.
Certificate hpe gaw ningpawt ninghpang san htai hta awng ai ni hpe jaw na rai nna, (HSK) hpe certificate gaw njaw ai raitim, madang (2) hte (3) hku nna gaw sharin ya na re. Jawng hpe March shata praw 1 ya shani kaw nna hpaw sharin sa wa na re hpe chye lu ai.
