St. Francis Xavier Boader Nta dingshawn kyupyi hpawng galaw
Laiza Jau Ginwang, Ja Htu Kawng mare kaw galaw gawgap da ai, St. Francis Xavier Boader Nta dingshawn kyuhpyi hpawng hpe, March shata praw 4 ya jahpawt hkying 10:00am aten hta galaw la lu sai re.
Kyu hpyi hpawng hta Mama Mary John Male Lu Mai kaw nna, chyeju dum ga hpe tsun ai. Dum nta gawgap ai hta garum la ai ni hpe Mama ni hku nna chyeju dum kumhpa shagrau ai lam ni galaw ai, dai hpang Manmaw Sara Daw Ginwang na Bishop Raymond Sumlut Gam kaw nna Karai mungga hpe htawn tsun ai.
St. Francis Xavier Boader galaw na matu, Du Kaba Sumlut Gum Maw (KIC Ningbaw Malai) kaw nna, shara jaw ya ai hte nta hpe gawgap la lu sai re. Jai lang ai gumhpraw ni gaw, Myen gumhpraw kyats 70,000,000 (Sen Sanit Tsa), Miwa Yuan 170,000 (Sinmi Mun Sanit Jan) hkrat ang ai, ya matut nna mung dai nta makau kaw htap masum re ai nta hpe bai gawgap jat na re lam, Mama Mary John Male Lu Mai tsun ai.
Akyu hpyi hpawng hta KIC Ningbaw Malai hte Magam Dap, Makan Dap hkan na lit nga ai myitsu Salang ni hte hpung masha ni sa du shang lawm ai lam chye lu ai.
