Nammaling hte Grup Yin Gawn Hkang jawng yu hpawng galaw
Masat yan (1) Namkawn Du wunkat jawng hte Masat yan (3,4) Ningpawt Ninghpang Nam maling hte Grup Yin Gawn Hkang wunkat jawng yu hpawng hpe March shata praw 7 ya shani hkying 10:00am aten hta Mungseng Yang Mare Nammaling hte Grup Yin Gawn Hkang Magam Dap (NGYD) Wunkat jawng kaw galaw la lu sai re.
Masat Yan (1) Namkawn Du jawngma hte Masat Yan (3,4) Ningpawt Ninghpang Nam maling hte Grup Yin Gawn Hkang jawng yu sai jawngma ni hpe shagrau lakmat jaw ai lam galaw ai.
Hpawng hta Wunkat yu sai jawngma ni hpe Nammaling hte Makau Grup Yin Gawn Hkang Dap a Lithkam Du Up Daju Hpunggan Hkun Nawng kaw nna, shatsam mungga ya na zawn tsun ai.
“Greng grak ai, atsam ningja rawng ai magam gun ni hpe anhte hku na jat bang la lu na matu, anhte magam dap ginjaw rung hte ya hpaw da nga ai ginwang ginjaw, Ginjaw rung ni hte magam gun ni hpe grau nna shagrang sa wa na matu, anhte magma dap kaw ra nga ai machye machyang sharin ai ndai wunkat jawng hta sharin sara bai shalat na matu yaw shada ai lam re” nga nna tsun ai.
Ndai wunkat jawng hta Masat Yan (1) Namkawn Du jawng yu ai jawngma marai (12) rai nna, Ningpawt Ninghpang Nam maling hte Grup Yin Gawn hkang jawngma ni marai (34), jawngma yawng marai 46 tup sharin hkam la sai re.
Jawng yu hpawng hta makan dap, magam dap a lit nga ai myitsu salang ni, jawngma kanu kawa ni hte Hpung woi Sara ni shang lawm ai.
Masat Yan (3,4) Ningpawt Ninghpang Nam maling hte grup yin Gawn Hkang wunkat hpe Ginjaw rung wang kaw 2022 ning February shata praw 3 ya kaw nna sharing hpang wa ai lam chye lu ai .
