Mungkan Amyu Shayi Masat Nhtoi Lamang Hkaw Tsun Hpawng galaw
Mungkan amyu shayi masat nhtoi lamang hkaw tsun hpawng hpe Htoi Gender and Development Foundation hpung kawn woiawn galaw nna, March shata praw 8 ya shani hkying 9:00am aten kaw Woi Chyai hpyen yen dabang Gawknu kaw galaw la lu sai re.
Hpawng hta Saranum kaba K Roi Awng kaw nna hpawng hpaw hkalum ga tsun ai hta “myu shayi ni gaw la ni hte nbung ai myit shang sha ai lam ni mung, grau nna anhte num ni kaw rawng ai atsam ningja ni rawng nga ai hpe mu lu ai. Ndai nbung taw ai ni mahkra ra kadawn taw ai lam ni hpe rap shara lu na matu gaw, anhte num wuhpung wuhpawng langai mi sha galaw nga nna nmai byin ai, anhte num shawa uhpawng yawng hte Asuya, CSO, NGO, Hpaji Du ni, Mung masa lam galaw ai ni yawng hkra myit hkrum let jawm galaw sa wa yang sha amyu shayi ni kaw ra kadawn ai lam hpe rapra ai hku galaw lu na re” nga nna tsun ai.
Dai hpang Mungkan Amyu shayi masat nhtoi labau hti ai lam, Sumhtang laika hti ai lam, Mungkan amyu shayi masat nhtoi ga san ga htai galaw ai lam, gin sup ga san ga htai ai lam ni galaw ai.
Mungkan amyu shayi masat nhtoi gaw, amyu shayi ni a shinggyim uhpawng masa, sut masa, htunghking lai len masa, mung masa lai len hta awng dang shakawn shagrau na matu mungkan ting hta masat nna galaw ai re. Mungkan amyu shayi hpung hpe 1911 ning kaw hpaw hpang wa ai re.
Dai ni hkaw tsun hpawng hta hpyen yen dabang na mungmasha ni hte magam dap shagu na magam gun amyu shayi ni shang lawm ai. Dai ning na hkaw tsun hpawng gaw shawoi shaning na hta masha grau law ai lam chye lu ai.
