Ga Ra Yang mare kaw bai wa nga ai hpyen yen shagu na mungmasha ni garum ningtum yak hkak nga
Ga Ra Yang mare kaw bai wa nga ai hpyen yen shagu na mungmasha ni ya ten garum ningtum ra kadawn nga ai lam hpe mungmasha ni tsun ai kawn na chye lu ai.
Dai mare hta shanu nga ai hpyen yen mungmasha ni gaw malu masha hte hkawm sa hkawm wa, ja gumhpraw mayak ni nga taw ai hpe buga masha langai ya na zawn tsun ai.
“Anhte gaw ya she bai wa nga ai majaw malu masha, ja gumhpraw tam na, pru hkawm sa na lam mung yak, tsan ai de mung npru shangun re ai majaw kachyi mi ahkaw ahkang dutdang taw ai, lam shagu hta naw yak taw nga ai.”
Buga de bai wa ai raitim ya ten hta gaw Myetda hte UNBS wuhpung wuhpawng ni kaw nna malu masha, shatmai gumhpraw ni hpe shata (3,4) nga yang shata 1 mi na matu garum jaw ai lam mung nga ai lam matut tsun ai.
Ga Ra Yang mare hta bai wa nga ai mungmasha ni gaw, 2022 ning January shta kaw nna Sha-it Yang, Maingna, Njang Dung, Du Kahtawng hpyen yen Camp sha n-ga kaga hpyen yen Camp shagu na mungmasha ni mung wa nga sai re. Ya ten gaw dai mare hta nta htinggaw (300) jan daram shanu nga sai re lam chye lu lai.
