Buga 23 na ramma ni hpe laili laika hkaw tsun hpawng galaw sa wa na

Mungmau Ginwang Jinghpaw Wunpawng Hkalup Hpung kawn woi awng galaw ai, buga 23 na ramma ni hpe KBC ramma komiti kaw nna, rap hku garan let, laili laika hkaw tsun hpawng hpe March shata 27 ya shani kawn, 31 ya shani du hkra galaw sa wa na re lam chye lu ai.

Rap (5) garan let galaw sa wa na hta Pang Sai rap hta buga hpung (4), Mungbaw rap hta buga hpung (7), Muse rap hta buga hpung (5), Namhkam rap hta buga hpung (5) ni rai nna, Munggu rap hta buga hpung (2) shang lawm ai re hpe chye lu ai.

Hkaw tsun hpawng galaw sa wa na hta Pang Sai rap hta March shata 27 ya shani Pang Sai buga kaw galaw sa wa na rai nna, Mungbaw rap hta March shata 28 ya shani Mungbaw mare buga kaw galaw sa wa na re lam chye lu ai.

Matut nna mung Muse rap hta March shata 29 ya shani Mawtawng Zupra buga kaw galaw sa wa na rai nna, Namhkam rap hta March shata 30 ya shani Yang Wu buga kaw galaw sa wa na hte Munggu rap hta gaw, March shata 31 shani Munggu buga kaw galaw sa wa re lam chye lu ai.

Ya na zawn laili laika hkaw tsun hpaw galaw sa wa na hta buga hpung shagu de nga ai ramma ni hpe kanu kawa ni hku nna, sa du sharin hkamla shangun na matut saw lajin dat ai lam,  saw shaga laika kaw na chye lu ai.