Rev.Dr. Lahtaw Saboi Jum Madu Yesu hta yup pyaw mat wa

Rev. Dr. Lahtaw Saboi Jum asak ( 83 ) ning gaw, June 26 ya shana hkying 7:55pm aten hta hkumhkrang hkamja lam nnga ai majaw, Yangon mare kaba kaw, Madu Yesu hta yup pyaw mat wa sai lam na chye lu ai.

Shi a hkumtsawp moi mang hpe Yangon mare kawn Myitkyina dum nta de, June 27 ya shani htaw lung wa sai rai nna, makoi mayang akyu hpyi ai lam hpe, July praw 3, bat hpang 1 ya shani hkying 11:00am aten hta Shatapru Hkalup hpung nawku htingnu kaw galaw nhtawm, Nawng Nang Hkristan lup ding lup ra de, makoi mayang na re lam chye lu ai.

Rev. Dr. Lahtaw Saboi Jum gaw, Jinghpaw ni kaw na Insein English Chyum Dakkasu kaw Chyum hpaji sharin la ai marai 6 kaw na langai re. KBC a Amu Madu magap lit hpe, laiwa sai 1993 ning kawn 1999 ning du hkra gunhpai nna, Ningbaw lit hpe mung, 1999 ning kawn 2002 ning laman matut gunhpai lai wa ai KBC magam gun usa mung rai nga ai. 2000 ning hta Shalom Foundation hpe mung, woi hpang ai sara kaba re.

1980 ning aten kawn Myen asuya hte KIO a lapran simsa lam bawngban ai hta shanglawm lai wa sai hpe mung chye lu ai.