Gumshem Myen hpyen dap ni hte KIA pawng hpawm hpyen hpung ni gasat gala majan byin
KIA Masat (3) Dap Ba, Masat (12) Dap Dung ginra, Nget Tada mare makau kaw gumshem Myen hpyen dap ni hte KIA, KPDF pawng hpawm hpyen hpung ni, March shata 23 ya jahpawt hkying 9:00am aten kaw nna gasat gala majan byin ai lam chye lu ai.
Gumshem Myen hpyen dap, Dapnu 88 kata na, Hk.L.Y (10, 77) hte Ts.K.Hk 16 kata na, Hk.M.Y (602) dap na pawng hpawm hpyen hpung ni gaw, Shwigu maga kawn KIA pawng hpawm hpyen hpung ni nga ai shara de, shamu shamawt shang wa ai majaw, gasat poi byin wa ai re lam, shawng lam shiga lawk kaw na chye lu ai.
KIA Masat 8 Dap Ba ginra, Namma Bum mayan hta mung, Myitkyina maga na rawt wa ai gumshem Myen hpyen dap a, Jet nbungli 2 gaw, March shata 23 ya shana maga hkying 3:40pm aten kalang, hkying 4:00pm aten hta lahkawng lang bawm wa jahkrat bun ai lam chye lu ai.
Sagaing jarit mayan hta mung, March shata 22 ya shani Indaw maga na hpyen modo 2 hte sa wa ai gumshem Myen hpyen ni hpe KIA, KPDF pawng hpawm hpyen hpung ni Kata mare makau kaw bawm hte hkap shingla gasat dat ai hpang, gumshem Myen hpyen ni, mungshawa nta 3 hpe wan nat jahten kau da ya ai lam, buga masha ni kaw na chye lu ai.
