KIA Masat (12) Dap Dung ginra hta gasat gala majan laja lana byin
KIA Masat (3) Dap Ba, Masat (12) Dap Dung ginra hta March 25 ya jahpawt myi mu wa ai kaw na gumshem Myen hpyen dap hte KIA, KPDF pawng hpawm hpyen hpung ni laja lana gasat poi matut byin nga ai lam chye lu ai.
“Dai hpawt myi mu wa ai hte hkring dat gap dat rai nga ai. Shwimaw Gyi mare makau kaw re. Dai na de hkying 3:30pm aten kaw na Myitkyina maga na rawt wa ai Jet nbungli 2 hte Shwimaw Gyi, Sitaung hte Sita grup yin shara ni hta bawm wa jahkrat bun ai” re lam shawng lam na lit nga ai salang ni kaw na chye lu ai.
Gumshem Myen hpyen dap, Hk.L.Y (10, 77) hte Hk.M.Y (602) dap na pawng hpawm hpyen hpung ni gaw, KIA, KPDF pawng hpawm hpyen hpung ni nga ai shara de, shamu shamawt chyinglau shang wa ai majaw gasat poi byin nga ai re.
KIA Masat (12) Dap Dung ginra hta March shata 23 ya shani kaw nna, gumshem Myen hpyen dap hte KIA, KPDF pawng hpawm hpyen hpung ni shani shagu gasat poi byin ai hta tai hpyen maga si, hkala law ai majaw 3 ya ngu na shani hta gumshem Myen hpyen dap ni, Jet nbungli hte bawm wa jahkrat bun ai hpe chye lu ai.
