Hpakant hta gumshem Myen hpyen nra ai lam, shawa n-gun madun

Hpakant ginra hta gumshem Myen hpyen hpe nra sharawng ai lam, mungshawa ni shawa n-gun madun ai lam hpe March shata 27 ya shani galaw ai lam chye lu ai.

Hpakant kata nga ai lung seng maw shagu shing grup nna, shawa n-gun madun ai lam galaw ai hpe chye lu ai.

Shawa n-gun madun ai lam hta “N ngut shi ai anhte na aten naw nga ai, rawt malan lam a daw dan ai lam hta mungshawa hta na kaga nnga ai anhte dang nan dang ra ai, shinggyim masha a hpring tsup ai nam chyim anhte rawt malan na she lu na re, tara nshang ai ra lata poi mungshawa hte gasat ga” nga ga si ni ka da ai sum pan hpai rai nna, shawa n-gun madun ai lam galaw ai hpe chye lu ai.

Ya na zawn shawa n-gun madun ai lam hpe lai wa sai 24 ya shani mung, Hpakant ginra hta KIA, PDF, NUG ni hpe madi shadaw ai lam mungshawa ni shawa n-gun madun ai lam galaw lai wa sai re.

Matut nna mung Hpakant ginra hta mung mare masha ni hpe gumshem Myen hpyen dap kaw nna, rim jep ai lam, masha rim woi mat wa ai lam ni jahkring hkring byin nga ai re.

Ndai zawn mungshawa ni shawa n-gun madun ai lam ni galaw ai lam gaw, Myen mung dan a daru magam ahkang aya hpe gumshem Myen hpyen dap ni n tara ai hku madu zing la kau ai kaw na byin wa ai re.