2022-2023 Hpaji ladaw hkairem hpaji sharin jawng, jawng yu hpawng galaw
Wunpawng Mungdan Shanglawt Asuya Hkairem Magam Dap kaw nna hpaw sharin ai, masat yan (9) lahta tsang hkairem (Diploma) hte masat yan (20) ningpawt ninghpang hkairem jawng yu hpawng hpe March shata 29 ya jahpawt hkying 10:00am aten hta Hkairem Magam Dap Hkru Kat Gawknu kaw galaw la lu sai re.
Dai ni jawng yu ai hta masat yan (9) lahta tsang hkairem (Diploma) jawngma marai (8) hte masat yan (20) ningpawt ninghpang hkairem jawngma marai (8) yawng marai (16) jawng yu lakmat hpe Sara Kaba Kareng Brang Seng kaw nna shagrau ya ai, dai hpang masat madang lu ai kumhpa hpe Du Kaba Nhpang Naw Bu (Shiga Magam Dap Lithkam) kaw nna shalai ya ai lam galaw ai.
Jawng yu sai sara/num ningnan ni hpe, Sara Kaba Kareng Brang Seng (Hkairem Jawng Up & Hkairem Magam Dap Lit Hkam) kaw nna numhtet numra shatsam mungga hpe tsun ai hta “Anhte bungli galaw wa ai shaloi sara/num kaja, hpa-awn kaja tai hkra shakut ga, tinang a myit hpe tinang hkang lu ai ni tai ga, wuhpung wuhpawng ni hpe kaja ai hku na galaw gun hpai ga, lit la gwi ai ni byin hkra galaw ga, tinang a manu hte pandung hpe dum ga, hkairem sara/num ngu ai ni gaw, hkaw sha matsun sha ai baw nre, woi awn ai ni she re.
Galoi mung sharin la ra ai, hkaja la ga, laika hti ga, myi hte mu la ai hpe matsing la ga, masha ni shana ai hpe madat la ga, hkan hkawm yu nna matsing ningting la ga, tinang gara madang du taw ai tinang a ginra masa hte bungpre ai hku nna galaw ga, anhte rawt malan prat naw re hpe galoi ma nmalap mai ai, jinghku jing-yu amyusha yawng a matu shakut mu apnawng dawjau ga” nga nna tsun ai.
Matut nna, Du Kaba Lahpai Zau Raw (DGA Lit Hkam hte Hkairem Jawng Woi Awn Komiti Salang) kaw nna mung, “Anhte a ninggawn mungmasa hta mungshawa ngamu ngamai lam lawm ai hte maren hkairem, Sut masa Hpaji Hparat lam ni hpe galaw sharawt shatsaw ya na ngu ai hta ndai hkairem mung langai lawm taw ai, dai hpe anhte ningpawt ninghpang shatai nna anhte a mungshawa ni hpe gaw sharawt ya na matu rai nga ai. Dai ni anhte ni shakut shaja na sharin la saga ai, tinang a magam bungli hta myit maju jung let shakut sa wa ra ai” nga nga nna hpaji jaw shatsam mungga hpe tsun ai.
Hkairem jawng hta lahta tsang hkairem jawng kaw lung na ni gaw, tsang 10 awng sai ni hte dakkasu htai lung ai rai nna, 3 ning lung ai hte Diploma jaw ai, ningpawt ninghpang jawng hta gaw tsang 8 kaw na tsang 10 lung ga sai ni rai nna, shata 10 lung ai hte jawng yu lakmat hpe jaw ai, 2023 ning jawng lung shaning kaw nna, Diploma lu sai ni hpe gaw 2 ning matut lung ai hte Bachelor of Agree (B.Ag) janmau hpe bai jaw na re lam matut chye lu ai.
Jawng yu hpawng hta nawku hpung woi sara ni, jawngma kanu kawa ni, CDM magam gun ni hte Magam Dap, Makan Dap shagu na myitsu salang ni sa du shang lawm ai lam chye lu ai.
Wunpawng Mungdan Shanglawt Asuya, Hkairem Magam Dap, Hkairem Jawng kaw nna, sharin hkamla ngut sai jawngma ni gaw, Diploma hta masat yan (9) du hkra rai yang, La marai (85), Num marai (17), masat yan (20) ningpawt ninghpang hta La marai (250), Num marai ((27) yawng marai (379) jawng yu la lu sai rai nga ai.
