Hpyen yen camp kaw na tinang a mare buga de bai nhtang wa sai mungmasha ni, yi sun hkauna galaw lu galaw sha na yak hkak nga

Myitkyina, Waingmaw hpyen camp kaw na tinang a mare buga rai nga ai, Dabak Yang mare na mungmasha ni yi sun hkauna galaw lu galaw sha na lam ni yak nga ai hpe mare masha langai tsun ai kaw na chye lu ai.

Moi hpyen yen n yen shi ai ten hta gaw, tinang na yi/sun/hkauna galaw sha ai shaloi gaw dumsu/nga ni the anhte galaw lu/sha ai. Ya gaw dumsu/nga ni n-nga mat ai majaw yi/sun/hkauna galaw sha na matu yak nga ai lam hpe buga hpung amu madu Sr.Gumaw Myat Awng ya na zawn tsun ai.

“Ya lai wa sai ten anhte gaw yi/sun/hkauna hpe madung tawn nna anhte galaw lu galaw sha ai. N-kau lu ai ding hku ni gaw ni nawn ai hkan na Nahtu jak ni shap nna galaw ai, raitim galaw lu galaw sha ai lam hta n-kau yak ai htinggaw ni gaw dinghku kata yak nga ai.”

Dabak mare kaw bai wa nga sai hpyen yen mungmasha ni gaw (2019) ning kaw (KECC) ni hku nna gap ya ai nta shara ni hta wa nga magang sai re. Myitkyina/ Waingmaw hkan na hpyen yen camp shagu na htinggaw (197) rai nna, nam de hprawng ai ni hte rai yang (220) daram gaw 2023 ning March shata 21ya shani Return Day ngu masat nna wa sai re. Nkau ni gaw numdaw lahkawng hta wa na mahkyen ni mung nga ai re lam chye lu ai.