Sagaing Ginwang, Kantbalu Gaiwang, Pazigyi mare kaw gumshem Myen hpyen ni nbungli hte bawm wa gap bun

Sagaing Ginwang, Kantbalu Gaiwang, Pazigyi mare kaw April shata 11 ya jahpawt daw hta, gumshem Myen hpyen dap ni nbungli hte bawm wa jahkrat bun ai majaw, Mungshawa marai 100 daram si hkrum nna, marai 50 daram gaw hkala hkrum ai lam na chye lu ai.

Pazigyi mare hta zuphpawng galaw nga ai ten hta, gumshem Myen hpyen dap kaw nna, Jet Fighter, Mi-35 nbungli hte bawm wa jahkrat bun ai sha n-ga, jak sinat ni hte mung gap sharu bun ai lam chye lu ai.

Si hkala hkrum ai hta asak nhpring shi ai ma ni hte Amyu shayi ni grau lawm nna, lagaw lata hte hkrum hkrang achyen achya, adaw achyen, gyinsun ni mung ayai aya byin mat ai hpe ginra shiga lawk sumla ni hta mu lu ai re.

Hkala n ba hkrum ai masha ni hpe ni nawn ai mare de htawt sit, tsi tsi hkam la taw nga ai lam chye lu ai. Kantbalu Gaiwang, Pazigyi mare hta nta htinggaw 200 hte mungmasha yawng marai 800 jan nga rai nna, gumshem Myen hpyen dap ni jahkring hkring shang chying lau ai shara re hpe mung chye lu ai.