KIA Masat (12) Dap Dung ginra hta chyinglau hkawm ai, gumshem Myen hpyen dap ni, hting nut sai
KIA Masat (3) Dap Ba, KIA Masat (12) Dap Dung ginra hta shamu shamawt chyinglau hkawm ai gumshem Myen hpyen ni April shata 11 ya shani hta hting nut mat wa sai lam na chye lu ai.
“Gasat poi hta gumshem Myen hpyen dap ni laknak kaba hte majoi gap sharu bun ai sha n-ga, nbungli jai lang nna wa htim gasat ai raitim, tai hpyen maga, si hkala law ai majaw htingnut mat wa ai masa pru ai” nga nna shawng lam na lit nga ai salang langai shana wa ai re.
Shwegu Ginwang, KIA Masat (12) Dap Dung ginra hta gasat poi byin ai 10 ya jan laman hta gumshem Myen hpyen dap ni gaw, mungshawa ni a mare kahtawng ni rai nga ai Si Moe Lay, Si Moe Gyi, Si Moe, Nat Lan,Ngt Tada, Man Wing hte Man Hka mare ni hpe wan nat kau ya ai lam mung chye lu ai.
Wan nat hkrum ai mare kahtawng hkan na mungshawa ni gaw, mare de bai nhtang wa ai lam nnga shi ai sha, tinang shim dum ai shara ni hkan naw shingbyin nga ai lam chye lu ai.
KIA Masat (3) Dap Ba, Masat (12) Dap Dung ginra hta gumshem Myen hpyen dap ni March shata 23 ya kaw nna,KIA Masat (12) Dap Dung ginra, hpyen n-gun law law hte htu shadut htim gasat shang wa ai majaw, laja lana gasat poi byin sai re.
