Gumshem Myen hpyen dap ni nbungli hte bawm wa jahkrat
Myitkyina maga na rawt lung wa ai gumshem Myen hpyen dap a jet nbungli 3 gaw, April shata 19 ya shana daw hkying 5:32pm aten kaw nna hkying 5:43pm aten laman hta KIA Masat (9) Dap Ba, Masat (6) Dap Dung ginra de, bawm wa jahkrat bun ai lam chye lu ai.
April shata 18 ya shani hta mung, jahpawt hkying 8:00am aten kaw nna hkying 8:45am aten laman hta Gumshem Myen hpyen dap, Hk.M.Y (12) dap kaw nna, Hpankan modo lam ding yang lung ai Hk.M.Y (11) dap na hpyen n-gun (80) daram hpe Gat Noi mare lai Lup Wa Kawng mayan kaw, KIA hpyen hpung ni hkap gap ai kawn gasat poi byin ai re lam chye lu ai.
Seng Hpra mare na mungmasha ni hpe rim woi nna lung wa ai Hk.M.Y (12), gumshem Myen hpyen dap ni hte KIA hpyen hpung ni hkying 8:00am aten kaw nna hkying 8:45am aten laman hta gasat poi byin ai.
KIA Masat (8) Dap Ba ginra hta mung, April shata 18 ya jahpawt hkyig 6:20am aten hta gumshem Myen hpyen Hk.L.Y (15) dap ni hpe KIA hpyen hpung ni laknak kaba hte sa gap ai hta gasat poi byin ai lam chye lu ai.
