KIA hte gumshem Myen hpyen dap ni gasat gala majan byin
Mungmyit Sinli Ga (Kachin Sub-state) KIA Masat (4) Dap Ba, Masat (34) Dap Dung ginra hta gunshem Myen hpyen dap hte KIA ni gasat gala majan byin ai lam chye lu ai.
April shata 29 ya shana maga hkying 7:40pm aten daram, gumshem Myen hpyen dap Hk.L.Y (71) dap na hpyen n-gun (15) daram nga ai, Mu Guk wan ahkun hkang se hta rung hte myi hprap wan rung hpe KPDF ni sa gap ai hta gasat gala majan byin wa ai lam, lit nga ai salang ni kaw na chye lu ai.
KPDF ni sa htim gap ai kaw gumshem Myen hpyen maga na bai nhtang gap ai hta gasat gala majan byin ai majaw, myi hprap wan rung wan hkru mat ai lam chye lu ai.
KIA Masat (2) Dap Ba, Masat (11) Dap Dung ginra hta mung April shata 28 ya shana maga hkying 7:00pm aten daram hta Makawk Zup Kahtawng kaw nna, Dum Bung maga rawt wa ai dap mying nchye ai hpyen n-gun (100) daram hpe KIA ni Loi Li Hka mayan kaw hkap gap ai kawn gasat gala majan byin ai lam chye lu ai.
KIA ni dap jung shara jahkrat nga ai Dap Ba, Dap Dung ginra ni hta gumshem Myen hpyen ni hpyen shamu shamawt nga ai majaw, gasat gala majan matut manoi ngu na byin nga ai re.
