Masat Yan (16) Balik Jawng hpaw hpawng galaw
Wunpawng Mungdan Shanglawt Asuya, Ginjaw Balik Dap kaw nna, hpaw sharin ai masat yan (16) Balik jawng hpaw hkawng lamang hpe May shata praw 3 ya jahpawt hkying 7:00am aten hta Ning-Awn Gawknu kaw galaw la lu sai lam chye lu ai.
Hpawng hta Balik Makan Dap, Ningtau Matsun Du, Du Up, Lalawng Ze Lum kaw nna, jawng tara hte jawng gaiwang masat ai lam hti shana ya ngut ai hpang, Balik Makan Dap Matsun Du, Lat Du Up Jum, Gumrai Sharoi kaw nna jawng hpaw shatsam mungga hpe ya na zawn tsun ai.
“Mungdan magam gun na matu du sa sai hte maren myit maju jung let shakut sa wa ra ai, magam bungli galaw na matu Karai Kasang lam madun ai mung rai nna, tinang nan myit daw dan na sa ai mung rai sai, kanu kawa a yaw shada kata kaw hkawm sa ai hta du sa ai ni mung lawm ai, dai majaw myit lawm hkum lawm let hkum hkrang lagaw lata yawng ap nawng shang lawm sharin hkaja sa wa na, Balik hpaji sharin hkam la nna, manu dan ai atsam ningja rawng ai Balik magam gun ni byin tai wa hkra shakut sa wa ra ai”
Masat yan (16) hta jawngma yawng marai 74 rai nna, Balik hpaji wunkat hpe May shata kaw nna, September du hkra shata 5 tup sharin sa wa na rai nhtawm, Ginwang Ginjaw shara shagu na jawngma ni sa sharin hkam la na lam chye lu ai.
Balik hpaji sharin wunkat hpe 2003 ning kaw nna hpaw hpang wa ai rai nna, Balik hpaji winkat yu sai jawngma yawng marai 600 jan sharin ngut la lu sai lam chye lu ai.
