Gumshem Myen hpyen ni hpe KIA ni bawm hte gap gasat

KIA Masat (9) Dap Ba, Masat (6) Dap Dung ginra hta April shata 13 ya jahpawt hkying 4:30am aten, Lung Sai Bum, Gwihka Hka maga na rawt wa ai gumshem Myen hpyen dap ni hpe KIA hpyen hpung ni bawm hte hkap gasat ai kawn gasat poi byin ai lam chye lu ai.

Lung Sai Bum, Gwihka Hka maga na rawt wa ai gumshem Myen hpyen dap Hk.L.Y (76) dap hte Balik pawng pawm hpung ni gaw, Khaing Tha Zin sau seng lambraw kaw gale pru wa ai hpe KIA hpyen hpung ni bawm hte hkap gap ai hta gumshem Myen hpyen maga si hkala nhtawm modo mung hten agrawp mat ai lam, shawng lam shiga lawk kaw na chye lu ai.

Si hkala ai ni hpe htaw la na matu sa wa ai 4WD modo 2 hpe mung, bai hkap gap ai lam nga ai. Dai hpang si hkala ai ni hpe San Cyoi lam hku Hpakant de htaw pru wa sai lam, ginra masha ni tsun ai.

Mungmyit Sinli Ga (Kachin Sub-State) KIA Masat (4) Dap Ba ginra hta mung, May shata 12 ya shani hkying 10:55am aten kaw nna hkying 11:25am aten hta Kuthkai kawn Sinli maga yu wa ai gumshem Myen hpyen modo (16) hpung ni hpe KIA hpyen hpung ni Hkawng Hkam ntsa kaw hkap gap gasat ai lam chye lu ai.