Gumshem Myen hpyen dap hte KIA ni gasat gala majan byin
KIA Masat (5) Dap Ba, Masat (3) Dap Dung ginra hta May shata 17 ya shani ka-ang hkying 12:55pm aten kaw nna hkying 1:20pm aten du hkra, gumshem Myen hpyen dap hte KIA ni gasat poi byin ai lam chye lu ai.
Gumshem Myen hpyen dap Hk.M.Y (389) dap na hpyen hpung ni gaw, Bum Tawng mare kaw na lung wa ai aten hta KIA ni hkap gap ai kawn gasat poi byin ai.
May shata 17 ya shani hta sha, KIA Masat (9) Dap Ba, Masat (44) Dap Dung ginra, Ka-maing Byuha Kawng kaw nga ai gumshem Myen hpyen ni kaw nna sinat kaba hte hkrup mara gap shadam ai lam, ginra masha ni kaw na chye lu ai.
Ndai zawn gasat gala majan byin ai hte gumshem Myen hpyen dap ni gaw, Nam Ya hte Khin Tawng mare na mungshawa ni hpe ninggang shatai rim woi hkawm ai lam ni galaw nga ai majaw mung mare masha ni hkrit tsang ai rai nna, nkau mungshawa ni gaw ni nawn ai mare kahtawng de, gan koi yen nga ai hpe mung na chye lu ai.
