Masat yan (10) Nursing hte Midwifery Diploma jawng, janmau shagrau hpawng galaw
Wunpawng Mungdan Shanglawt Asuya, Ginjaw Hkamja Dap kaw nna hpaw sharin ai masat yan (10) Nursing hte Midwifery Diploma jawng, janmau shagrau hpawng hpe June shata praw 9 ya jahpawt hkying 9:00am aten hta Hkamja Lam hte Tsi Hpaji sharin Jawng Gawknu kaw galaw la lu sai.
Janmau shagrau hkam la ai jawngma ni gaw, Nursing Diploma lakmat hkam la ai marai (190), Midwifery Diploma lakmat hkam la ai marai (156) yawng marai (346) tup janmau shagrau hkam lu sai re.
Hpawng hta Tsi jawng Up, Sarawun. Sumdu Htu Lum kaw nna Jawng sumtang tang madun ai lam hte Ginjaw Hkamja Dap Lit Hkam, Du Up Jum Lamai Seng Hkum kaw nna shatsam mungga hpe ya na zawn tsun ai.
“Tsi magam gun ni hkan nang hkan sa ra ai tara hpe hkan nang hkan sa nna, Mungchying mung shawa ni a matu kam hpa ging ai tsi magam gun ni byin tai wa ga, tinang hta ang wa ai lit hpe kangka let gun hpai ga, mungshawa ni a ntsa myit galu kaba ai hte kanawn mazum sa wa ga, tsi gawn lajang ai hta raitim, mungshawa hpe jahkrit shama ai lailen, nsam, tsun shaga ai lam, pawt sindawng ai lam ni hpe koi ga, anhte Amyusha hkamja lam hpe rawt jat hkra woi awn shakut shaja sa wa ai ni byin tai wa u ga”
Tsi jawng hpe lai wa sai 2021 ning, June shata kaw nna hpaw sharin nhtawm, sharin ladaw (2) ning masat nna sharin achyin ya ai re hte (2) ning laman pre class hpe shata (2) la nna, Wunpawng Amyusha ni chye da ging ai Ninggawn Mungmasa Lam Yan, Rawt Malan Labau, Jinghpaw ka htung ka lai hte English sharin ginhpan ni hpe sharin ya nna, jawng lung ladaw (2) ning laman san poi kaba (4) lang san jep ai lam ni galaw ai.
Hpawng lamang hta saw shaga da ai Magam Dap, Makan Dap de na magam gun ni, makam masham hpung woi sara ni, jawngma kanu kawa ni hte jawngma ni angwi apyaw galaw la lu sai lam chye lu ai.
