Masat yan (10) Nursing hte Midwifery Diploma jawng yu sai magam gun nnan ni hpe hpaji jaw shatsam mungga hkaw tsun hpawng galaw
Wunpawng Mungdan Shanglawt Asuya, Ginjaw Hkamja Dap kaw nna hpaw sharin ai Masat yan (10) Nursing hte Midwifery Diploma jawng yu sai magam gun nnan ni hpe hpaji jaw shatsam mungga hkaw tsun hpawng lamang hpe June shata 10 ya shajahpawt hkying 9:00am aten hta Hkamja Lam hte Tsi Hpaji sharin Jawng Gawknu kaw galaw la lu sai.
Hpawng hta Ningtau Ninggawn Amu madu, Slgkb. Labang Doi Pyi Sa kaw nna hpaji jaw shatsam mungga tsun ai hta “anhte Wunpawng Amyu sha ni a myit masa, nga sat nga sa ni hpe nhtang maram yu dinglik yu ai shaloi, galai shai na lam nnga yang nmai galu kaba ai, myit jasat akyang lailen ni hpe galai shai sa wa ga, sharin da ai hpe grau nna chye chyang wa hkra hkaja na hte tinang hku nna, mung shawa hkamja lam hpe aten tup ladat shaw nna, aten tup bungli galaw lu ai, aten tup nrau ai hku nna galaw sa wa ai rai yang, mungshawa hkamja lam madang tsaw na re” nga nna tsun ai.
Jawngma ningtawn masat lu mat ai ni gaw, Nursing Diploma kaw na Maran Roi Seng San no. 1, Dinggring Seng Nu Nu Nan no. 2, Nhkum Seng Ja no. 3 rai nna Midwifery Diploma kaw na Lamuk Hkawng Naw no. 1, Lamai Hkawn Nan no. 2, Maran Seng Bu no. 3 lu ai. Dai ni jawng yu sai magam gun nnan yawng marai (346) re lam chye lu ai.
Hpawng lamang hta saw shaga da ai Magam Dap, Makan Dap shagu de na myitsu salang ni, jawngma kanu kawa ni hte jawngma ni sa du shang lawm ai lam chye lu ai.
