Gumshem Myen hpyen dap hpe KIA ni hkap shingla gasat
Mungmyit Sinli Ga (Kachin Sub-State), KIA Masat (4) Dap Ba, Masat (8) Dap Dung ginra hta June shata praw 9 ya jahpawt hkying 9:16am aten, gumshem Myen hpyen dap hpe KIA ni hkap shingla gasat ai kawn gasat poi byin ai lam chye lu ai.
Nam Gut kaw nna Nawng Swi maga de lagaw lam rawt wa ai gumshem Myen hpyen n-gun (20) jan gaw, KIA ni shara la nga ai Man Lung hte Nam Gut lapran kaw, shamu shamawt lung wa ai hpe KIA ni hkap gap ai kawn gasat poi byin ai re.
Dai shani hta sha, Kuthkai Asiaworld Gate kaw nna, lagaw lam hte rawt wa ai Dapnu (Tatma 99) kata na hpyen hpung ni hpe mung, KIA ni Nawng Swi makau kaw hkap shingla gasat ai lam, ginra shiga lawk kaw na chye lu ai.
