Gumshem Myen hpyen dap hpe KIA ni hkap shingla gasat
Ginjaw Ginra, KIA Masat (5) Dap Ba, Masat (18) Dap Dung ginra, Lai Lum Awng Ja maga na shamu shamawt shang wa ai gumshem Myen hpyen dap, Dapnu (Tatma 88) kata na hpyen ni hpe KIA hpyen hpung ni June shata 16 ya shana maga hkying 1:30pm aten hta hkap shingla gasat ai lam chye lu ai.
Gumshem Myen hpyen dap Hk.L.Y (13) dap na hpyen n-gun (100) jan hpung ni gaw, Lai Lum Awng Ja maga kawn shamu shamawt shang wa ai hpe KIA ni Nam San Hka mahkrai kaw, hkap shingla gasat ai lam chye lu ai.
Dai hkap shingla gasat ai hta gumshem Myen hpyen maga na hpyen arung arai nkau mi hpe KIA ni padang dip zing la lu ai lam, shawng lam shiga lawk kaw na chye lu ai.
Gumshem Myen hpyen hpung ni hpe KIA ni hkap shingla gasat dat ai hpang, Lai Lum Awng Ja kaw Dap jung shara jahkrat nga ai Myen hpyen ni gaw, Nam San Hka Nam maga de sinat kaba 2 lang gap shadam bun ai lam, ginra masha ni kaw na chye lu ai.
Ya na zawn, gasat gala majan byin wa ai majaw, Nam San Yang mare masha nkau mi gaw tinang shim dum ai shara de gan koi yan nga ai ni mung nga ai re lam buga masha ni tsun ai kaw na chye lu ai.
