Mungkan Ka-ni nanghpam ninghkap masat ninghtoi hpawng galaw

Mungkan ka-ni nanghpan ninghkap masat ninghtoi hpawng hpe Ninggawn Daju ka-ni nanghpan Pat Jasan Komiti ni woi awn let June shata 26 ya jahpawt hkying 9:00am aten hta Laiza Muklum, Sinpraw Majoi Gawknu kaw galaw la lu sai re.

Hpawng hta Mungkan ka-ni nanghpang ninghkap masat ninghtoi mungga hpe Ninggawn Daju ka-ni nanghpang Pat Jasan Komiti Ningbaw, Du Up Jum Lahpai Hting Wawm ya na zawn tsun ai.

“Anhte Wunpawng Amyusha ni a hpyen madung rai nga ai ka-ni nanghpam hpe gasat shamyit lu ai magam lit hta yawng myit hkrum ta gindun let, n-gun kaba hte gasat shamyit kau ga, san seng ai kasi tai ai kasi la mai ai lam mung rai wa u ga, yawng myit hkrum nna galaw yang teng sha awng dang na re, shada myi-man tau hkat, mayun kumhpa lagu jaw hkat galaw jang galoi n-awng dang na re. Dai majaw tinang hkum hpe mung, tinang nan hkang zing lu hkra shakut ga, Amyusha ni yawng madu myit hte madu tai nna gasat sa wa ai rai yang teng teng sha padang dip lu na re” nga tsun ai.

Mungkan ka-ni nanghpan ninghkap masat ninghtoi hpawng nhpang shi yang jahpawt hkying 7:00am aten hta Laiza Hkalup hpung nawku jawng kaw nna, Manau wang du hkra lam hkawm n-gun madun ai lam, mungkan ka-ni nanghpam ninghkap masat ninghtoi lamang hpe shawa nsen hte madi shadaw ai lam galaw ai.

Mungkan ka-ni nanghpam ninghkap masat ninghtoi hpe Laiza Muklum kata hta sha n-ga buga shara shagu hta mung galaw ai lam chye lu ai.

Mungkan ka-ni nanghpang masat ninghtoi hpe lai wa sai 1988 ning, June shata 26 ya hta shawng ningnan galaw hpang ai rai nna, dai ning 2023 ning, June shata 26 ya hta gaw (35) lang na masat ninghtoi hpawng mung rai nga ai.

Dai ni na hpawng lamang hta Magam dap, Makan Dap shagu na magam gun ni, mungshawa ni hte rau angwi apyaw galaw la lu sai lam chye lu ai.