Masat yan (14) Immigration jawng yu hpawng galaw
Wunpawng Mungdan Shanglawt Asuya, Mungchying Uphkang Dap, Masha pru/shang Gawnhkang Makan Dap kaw nna, hpaw sharin ai Masat yan (14) Immigration jawng yu hpawng hpe June shata 30 ya jahpawt hkying 9:00am aten hta Hpungwa Ning Awn Gawknu, DGA kaw galaw la lu sai.
Hpawng lamang hta jawng yu sai jawngma ni hpe jawng yu lakmat shagrau ai lam, Magam Aming Order hti ai lam, Ningtawn kumhpa shagrau ai lam galaw ai.
Dai hpang Salang kaba Hpunggan Zau Gun (DGA ningtau lit Hkam) kaw nna, jawng yu shatsam mungga tsun ai hta “Jawng gawk kaw sharin achyin dat ya ai hpe ta tut bungli hta hkrang shachyaw la chye ai ni rai ga, tinang a myit, hkum ni hpe uphkang dang ai wa, jaw kaja hku nna myit la chye ai wa she manang wa hpe uphkang na, shawa hpe uphkang na mai byin ai re. Tinang a hkum hpe shawng n uphkang dang yang, n reng dang yang shawa, manang ni hpe mung uphkang na lam nnga ai hpe galoi ma n malap kau ga, adum ashai rai nna galoi mung tinang a hkum hpe shawng shading sharai nna, uphkang gawnhkang dang na she shawa bungli hta shachyen shaja ga” nga nna tsun ai.
Dai ni jawng yu sai jawngma ni gaw la marai (41) hte num marai (10) yawng marai (51) tup jawng yu la sai re. Immigration jawng wunkat hpe lai wa sai March shata 28 ya shani hta hpaw sharin hpang ai lam chye lu ai.
Hpawng hta saw shaga da ai Magam Dap, Makan Dap shagu na myitsu salang ni, jawngma kanu kawa ni hte jawngma ni yawng angwi apyaw galaw ngut kre la lu sai lam mung chye lu ai.
