KIA Masat (3) Dap Dung ginra hta gasat gala majan matut byin
KIA Masat (5) Dap Ba, Masat (3) Dap Dung ginra hta gumshem Myen hpyen dap, Shwe Min P.T.Ts pawng hpawm hpyen hpung ni hte KIA hpyen hpung ni, June shata 29 ya shani ka-ang hkying 12:50pm aten hta gasat gala majan matut byin ai lam chye lu ai.
Bum Tawng kaw shara la nga ai gumshem Myen hpyen dap hte P.T.Ts pawng hpawm hpyen hpung ni hpe KIA hpyen hpung ni sa htim gap ai kawn gasat poi byin ai re lam chye lu ai.
Dai gumshem Myen hpyen dap ni kawn KIA hpyen hpung ni nga ai maga de sinat kaba 5 lang hte Drone bawm 2 lang sa jahkrat bun ai lam nga ai.
June shata 29 ya shani hta sha, Sadung, Chi Hpwi lamshe Deng (13) kaw shara jahkrat nga ai, gumshem Myen hpyen shagyit (Gate) hpe KIA hpyen hpung ni sinat kaba hte sa gap gasat ai lam mung chye lu ai.
