Lanam Hpungtsin Futsal gawdin ninggang kashun ginsup ai ginchyum dat shagrau lamang galaw

Wunpawng Mungdan Shanglawt Asuya, Ninggawn Daju ginsup komiti kaw nna, woi awn ai Lanam Hpungtsin Futsal gawdin ninggang kashun ginsup ai ginchyum dat shagrau lamang hpe July shata praw 1 ya shana maga hkying 4:00pm aten hta Nazerath Zinlawng Futsal gawdin ginsup pa kaw galaw la lu sai re.

Futsal gawdin ninggang kashun ginsup lamang hta ninggang masat lu mat ai ni gaw, La gawdin hpung na Simsa FC ni No. 1, Secret FC ni No. 2, Sut Madu FC ni No. 3 rai nna, num gawdin hpung na Gang Hkau FC No. 1, Friends Zone FC No. 2 hte Laiza United FC ni No. 3 lu ai lam chye lu ai.

Ndai ginsup lamang hta La ginsup hpung ni hpe gaw, No. 1 ni hpe lap 5,000,000 (Sen Manga Shi), No. 2 ni hpe lap 2,000,000 (Sen Hkun), No. 3 ni hpe lap 1,000,000 (Sen Shi) rai nna, Num ginsup hpung ni hpe gaw, No. 1 ni hpe lap 3,000,000 (Sen Sumshi), No. 2 ni hpe lap 2,000,000 (Sen Hkun) hte No. 3 ni hpe lap kyats 1,000,000 shagrau ai.

Lanam Hpungtsin Futsal gawdin ninggang kashun ginsup lamang hta La ginsup hpung (34) hte Num ginsup hpung (8) rai nna, ginsup wuhpung yawng (42) re. Ndai ginsup lamang hpe lai wa sai June shata 19 ya shani kaw nna, ginsup hpang nhtawm dai ni July shata paw 1 ya hta gaw, ninggang kashun ginsup poi hpe galaw la lu sai re.

Gawdin ninggang kashun ginsup lamang hta Magam Dap, Makan Dap hkan na myitsu salang ni hte mungshawa kanu, kawa, ramma ni sa du yu n-gun jaw ai lam mung chye lu ai.