KIA Masat (3) Dap Dung ginra hta gasat gala majan laja lana matut byin
KIA Masat (5) Dap Ba, Masat (3) Dap Dung ginra hta July shata praw 1 ya jahpawt hkying 9:00am aten daram hta gumshem Myen dap hte KIA hpyen hpung ni gasat gala majan laja lana matut byin ai lam chye lu ai.
Sadung Kampaiti lam makau Lagat Kawng hte Nwan Yang lapran hta htu shadut lung ai gumshem Myen hpyen dap ni hte KIA hpyen hpung ni laja lana gasat poi byin ai hta gumshem Myen hpyen maga na machyi hkala hkrum ai majaw bai htingnut sai lam chye lu ai.
Dai gasat poi byin ai shara hta gumshem Myen hpyen dap ni nbungli hte mung bawm wa jahkrat bun ai raitim, KIA maga hpa nra ai lam na chye lu ai.
June shata 30 ya shani hta mung, Bum Tawng, Nwan Kawng kaw nga ai gumshem Myen hpyen dap ni KIA hpyen hpung ni nga ai maga de sinat kaba hte shawng gap bun nna, gumshem Myen hpyen dap Hk.L.Y (37), Hk.M.Y (384) hte Shwe Min P.T.Ts pawng hpawm hpung ni htu shadut lung wa ai majaw, gasat poi byin ai re lam, shawng lam shiga lawk kaw na chye lu ai.
Gasat poi byin ai ten hta gumshem Myen hpyen ni kaw nna, KIA hpyen hpung ni nga ai maga de Drone bawm 6 lang sa jahkrat bun ai lam chye lu ai. KIA Masat (3) Dap Dung ginra hta June shata 22 ya shani kaw nna, gumshem Myen hpyen dap hte Shwe Min (P.T.Ts) ni htu shadut chyinglau shang wa ai majaw, gasat poi matut manoi byin nga ai re.
Ya mung hpyen masa naw shaja hkat nga ai majaw, gasat gala majan matut byin wa mai ai lam, ginra shiga lawk kaw na chye lu ai.
၎
င
၎
၎
၎
င
၎
၎
